2017日本環球影城 USJ 萬聖節活動全攻略！

只有環球影城至可以超越環球影城！每年都令人引頸以待嘅日本大阪USJ萬聖節限定活動已經出咗2017年嘅最新消息啦！除咗有今年最新嘅日間『慶祝遊行』精彩登場之外，仲有規模更勝舊年嘅夜間『街頭殭屍』，等你可以由朝玩到晚！（圖片來源：日本環球影城）

日間活動

活動期間：2017年9月8日（五）～ 2017年11月5日（日）

＃慶祝遊行（festa・de・parade）

最鐘意睇樂園遊行嘅人就絕對唔可以錯過呢次期間限定嘅『慶祝遊行』！今年嘅萬聖節遊行將會以變裝作為主題，大家可以盡情咁打扮，加入遊行嘅行列！呢個時候就唔洗再怕醜啦，嚟得不如趁呢個機會好好咁瘋狂下！遊行會喺每日嘅14：30開始，想加入嘅朋友記得要留意行程同路線安排呀！

＃Happy Trick or Treat

平日就最鐘意攪攪震、惹麻煩嘅Minion又點會錯過呢次光明正大曳曳嘅機會呢～喺今年新開幕嘅『Minion Park』將會有Minion一齊加入戰局，堆出各位大小朋友夢想中嘅糖果山，一定要趁機去朝聖下、一齊Trick or Treat！

夜間活動

活動期間：2017年9月9日（六）～2017年11月5日（日）
（比日間活動係遲一日開始㗎，要去嘅人要注意下日子安排～）

唔好話小編唔提醒大家～夜間活動基本上都係偏向大朋友嘅Level，如果你有帶小朋友嘅話小編真係唔太建議留低玩，一來小朋友會嚇親，二來所有活動都有年齡限制，即使有大人陪都建議至少要係小學生！準備好？咁就跟住小編繼續碌落去睇啦！環球影城將今次嘅萬聖節活動細分咗好幾個驚嚇等級㗎⋯

＃街頭殭屍

Level 1～2／18：00～
平日最鐘意睇殭屍片？9月開始環球影城就要帶比你超越以往嘅殭屍體驗～剩係每日都會出現嘅基本款殭屍就有成20款，仲會推出落雨日子嘅限定出沒版，所以無論颳風又好、落雨又好，咩天氣都有各種各樣嘅殭屍等你嚟野生捕獲！

＃亡者森林（Dead or Alive）

Level 4／步行式迷宮
20種殭屍再加埋落雨限定款喺路上面行嚟行去都係覺得唔夠刺激？咁就要試下環球影城今年新推出嘅『死亡迷宮』啦！據官方嘅講法，舞台將設定為殭屍接二連三出現嘅人間煉獄，玩家要同大量殭屍喺場景入面對峙，希望帶俾大家生死瞬間嘅顫慄感！剩係想像下都覺得刺激到震呀！！！

＃創傷3-恐怖監禁實驗室-

Level 10／步行式迷宮（需要另外購票體驗、年齡限制15歲以上）
恐怖體驗再進化！舊年以超越大家想像嘅恐怖體驗引發話題嘅『創傷』系列今年再次改版升級，要帶俾遊客有別於以往嘅感官刺激！更厲害嘅係，今年嘅升級版史上最驚悚體驗會將時間增加至35分鐘咁多！對於鐘意恐怖體驗嘅人嚟講應該會超幸福！

＃娃鬼回魂-Chucky瘋狂醫院-

Level 5／步行式迷宮
鬼娃又嚟啦！諗起細個俾Chucky嚇到夜晚瞓唔到嘅回憶，見到佢個樣都即刻心都寒一寒⋯但我哋就係要愈戰愈勇！體驗喺某間奇怪嘅醫院入面蕩失路，同時俾Chucky同佢班手下襲擊嘅緊張刺激感～喺超現實世界觀入面感受比舊年又升咗LV嘅恐懼，究竟今年嘅Chucky要帶嚟幾得人驚嘅瘋狂之夜？咁就要你親身嚟體驗過先知！

＃猛鬼街-迷宮3-

Level 5／步行式迷宮（需要抽整理券）
Freddy仲持續搵緊佢落手嘅目標！大家會被拖入去無盡嘅噩夢入面，必須出盡奶力、諗辦法逃出Freddy嘅追殺！大家盡情享受要周圍匿嘅恐懼啦～

＃大法師-驅魔行館-

Level 5／步行式迷宮（需要抽整理券）
只係見到呢張相小編已經唔得啦⋯喺令人毛骨悚然嘅鬼屋入面，被捲入附身喺年幼少女身上嘅邪惡惡魔同要進行除魔儀式嘅人之間！仲有令全世界震撼嘅經典恐怖場景，都會忠實咁重現喺大家嘅眼前！（比如話擰轉條頸好似蜘蛛咁爬落樓嗰幕⋯）
另外每年嘅USJ萬聖節活動都會吸引一大批人去朝聖，雖然啲遊樂設施都超級恐怖嚇人，但都仲係有源源不絕嘅人潮會搶住入去嚇自己（咦？），所以環球影城都推出咗Express Pass：萬聖驚魂夜版，等大家可以輕鬆咁玩勻呢啲期間限定嘅刺激設施～

以上就係2017年日本環球影城萬聖節特別活動嘅消息，剩係睇圖同字都已經忍唔住想去每樣玩十次！！！小編已經準備好要扮鬼扮馬去癲返轉啦，你仲等咩？

想玩日本環球影城但買飛又煩又複雜？唔洗擔心，KKday幫你準備好晒啦～

▶︎【官方授權】日本環球影城® 電子門票
▶︎【官方授權】日本環球影城®門票＋快速® 通關
▶︎【官方授權】日本環球影城®VIP入園手環＋阿倍野HARUKAS展望台門票
▶︎【萬聖節期間限定】日本環球影城®萬聖驚魂夜快速通關券 (不含門票)

2017日本環球影城 USJ 萬聖節活動全攻略！